ᐅᖅᓱᐊᓗᓕᕆᔨᒃᑯᑦ ᑲᒪᒋᔭᒃᓴᖃᖅᐸᒃᐳᑦ ᓂᐅᕕᕐᓂᕐᒥᒃ

ᐅᖅᓱᐊᓗᓕᕆᔨᒃᑯᑦ ᑲᒪᒋᔭᒃᓴᖃᖅᐸᒃᐳᑦ ᓂᐅᕕᕐᓂᕐᒥᒃ, ᓄᒃᑕᖅᑎᑦᑎᓂᕐᒥᒃ (ᑎᑭᑎᑦᑎᓂᕐᒥᒃ), ᑐᖅᑯᖅᓯᒪᑎᑦᑎᓂᕐᒥᒃ ᑐᓂᐅᖅᑲᐃᓂᕐᒥᒡᓗ ᑕᒪᐃᓐᓂᑦᑎᐊᖅ ᐅᖅᓱᐊᓗᖕᓂᒃ ᓄᓇᕘᒥ. ᓄᓇᓖᖕᓂ ᒪᕐᕉᖕᓂ (ᐃᖃᓗᐃᑦ ᐊᒻᒪᓗ ᐃᖃᓗᒃᑑᑦᑎᐊᖅ), ᑐᓂᐅᖅᑲᐅᑕᐅᕙᖕᓂᖓ ᐱᑕᖃᕐᓂᖓᓂᒡᓗ ᐊᐅᓚᑦᑎᕙᖕᓂᖅ ᐊᓯᐊᓄᑦ ᐱᓕᕆᐊᖑᖃᑦᑕᖅᐳᒍᖅ, 25-ᖑᔪᓄᓪᓗ ᐊᒥᐊᒃᑯᓄᑦ ᐃᓂᓄᑦ, ᐅᖅᓱᐊᓗᓕᕆᔨᒃᑯᑦ ᐊᑐᖅᐸᒃᐳᑦ ᓄᓇᓕᖕᒥᐅᓂᒃ ᑳᓐᑐᓛᖃᖅᑎᐅᔪᓂᒃ ᐱᑎᑦᑎᖃᑦᑕᖁᓪᓗᒋᑦ ᐱᔭᐅᔭᕆᐊᓕᖕᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒃ. ᑐᑦᑕᕐᕕᒋᔭᐅᔪᑦ ᐃᓂᖃᖅᐳᑦ ᑲᖏᖅᖠᓂᕐᒥ, ᐱᖓᓱᓂᒃ ᐊᕕᒃᓯᒪᓂᕐᓄᑦ ᑎᑎᕋᕐᕕᒃᑕᖃᖅᖢᓂ ᑲᖏᖅᖠᓂᕐᒥ, ᐃᖃᓗᒃᑑᑦᑎᐊᒥ ᒥᑦᑎᒪᑕᓕᖕᒥᓗ.

ᐊᐅᓚᑕᐅᓂᖓᓄᑦ ᖃᓄᐃᓕᖓᓂᕆᔭᖓ

ᐅᖅᓱᐊᓗᓕᕆᔨᒃᑯᑦ ᖃᓄᐃᓕᐅᖅᐸᒃᐸᑦ?

ᐅᖅᓱᐊᓗᓕᕆᔨᒃᑯᑦ ᑲᒪᒋᔭᒃᓴᖃᖅᐸᒃᐳᑦ ᐱᓕᕆᐊᖃᕐᓂᕐᒥᒃ ᐅᑯᓂᖓ ᐱᓕᕆᐊᒃᓴᐅᕙᒃᑐᓂᒃ:

• ᐊᕐᕌᒍᑕᒫᑦ ᐊᖏᔪᒥᒃ ᐅᖅᓱᐊᓗᖕᒥᒃ ᐱᑖᖅᑎᑦᑎᒃᑲᓐᓂᖅᐸᖕᓂᖅ – ᓄᓇᕗᑦ ᒐᕙᒪᖓ ᒫᓐᓇᒃᑯᑦ ᑐᓂᓯᖃᑦᑕᖅᑐᑦ ᑳᓐᑐᓛᒋᔭᐅᓂᐊᖅᑐᓂᒃ ᐊᖏᔪᒥᒃ ᓂᐅᕕᕐᓂᐊᕐᓗᓂ ᓄᒃᑕᖅᑎᑦᑎᓂᐊᕐᓗᓂᓗ ᐅᖅᓱᐊᓗᖕᓂᒃ ᓄᓇᓕᖕᓄᑦ.
• ᐊᖏᔪᒥᒃ ᐅᖅᓱᐊᓗᖕᒥᒃ ᑐᖅᑯᖅᓯᓯᒪᕙᖕᓂᖅ – ᓄᓇᕗᑦ ᒐᕙᒪᖓ ᓇᖕᒥᓂᖃᖅᐳᖅ ᑕᒪᐃᓐᓂᒃ ᐅᖅᓱᐊᓗᖕᒧᑦ ᐊᖏᔪᒧᑦ ᑐᖅᑯᖅᓯᓯᒪᕝᕕᖕᓂᒃ ᖃᑦᑕᐅᔭᖑᐊᓂᒃ ᑐᓂᐅᖃᕐᓂᐅᕐᓗᓂᓗ ᐃᓂᒋᔭᐅᕙᒃᑐᓂᒃ ᑕᒪᐃᓐᓂ ᐊᑐᓂᑦ 27-ᓂ ᓄᓇᓕᖕᓂ ᐱᔨᑦᑎᕋᕐᕕᐅᕙᒃᑐᓂ ᐅᖅᓱᐅᓗᓕᕆᔨᒃᑯᓐᓂᒃ ᐅᓇ ᑭᑭᑕᐅᓪᓗᓂ, ᐃᖃᓗᒃᑑᑦᑎᐊᖅ, ᑕᐃᑲᓂ ᐃᓂᒋᔭᐅᔪᑦ ᐃᓛᒃᑰᖅᑐᒥᑦ ᓇᖕᒥᓂᕆᔭᐅᓂᖏᓐᓄᑦ.
• ᓄᓇᓕᖕᓂ ᑐᓂᐅᖅᑲᐃᕙᖕᓂᕐᒧᑦ ᑳᓐᑐᓛᒋᔭᐅᔪᑦ – ᐅᖅᓱᐊᓗᓕᕆᔨᒃᑯᑦ ᑐᓂᓯᕙᒃᐳᑦ ᐊᐅᓚᑦᑎᕙᒃᐳᓪᓗ ᑳᓐᑐᓛᒋᔭᐅᔪᓂᒃ ᓄᓇᓕᖕᓂ ᓇᖕᒥᓂᕆᔭᐅᔪᓂᒃ ᑕᐃᒪᐃᓕᐅᖃᑎᖃᖅᐸᒃᖢᑎᒃ ᑕᒪᐃᓐᓂ ᐊᑐᓂᑦ 27-ᓂ ᓄᓇᓕᖕᓂ ᑐᓂᐅᖅᑲᐃᖃᑦᑕᖁᓪᓗᒋᑦ ᐅᖅᓱᐊᓗᖕᒥᒃ ᐊᑐᖅᑎᐅᕙᒃᑐᓄᑦ.
• ᐊᑭᓕᖅᓱᕆᐊᖃᖅᐸᒃᑐᓄᑦ ᐊᐅᓚᑦᑎᕙᖕᓂᕐᒧᓪᓗ – ᐅᖅᓱᐅᓗᓕᕆᔨᒃᑯᑦ ᑲᒪᒋᔭᒃᓴᖃᖅᐳᑦ ᑕᒪᐃᓐᓄᑦ ᐱᓕᕆᓂᐅᕙᒃᑐᓄᑦ ᐊᒃᑐᐊᓂᖃᖅᑐᓄᑦ ᐊᑭᓕᖅᓱᕆᐊᖃᖅᐸᒃᑐᓄᑦ ᐊᐅᓚᑦᑎᕙᖕᓂᕐᒧᓪᓗ ᐅᑯᐊ ᐃᓚᒋᔭᐅᓪᓗᑎᒃ: ᐊᐅᓚᑦᑎᓂᖅ ᓄᓇᓕᖕᓂ ᑐᓂᐅᖅᑲᐃᕙᖕᓂᕐᒧᑦ ᑳᓐᑐᓛᒋᔭᐅᓂᐊᖅᑐᓂᒃ; ᐊᔪᕈᓐᓃᖅᓴᖅᑎᑦᑎᓂᖅ ᓄᓇᓕᖕᓂ ᑳᓐᑐᓛᖃᖅᑎᐅᓂᐊᖅᑐᓂᒃ; ᑲᒪᒋᔭᖃᕐᓂᕐᒥᒃ ᐊᑭᓕᖅᓱᒐᒃᓴᕐᓂᒃ (ᐊᑭᓕᒐᒃᓴᓕᐅᖅᐸᒃᖢᑎᒃ ᐊᑭᓕᖅᑕᐅᔭᕆᐊᓕᖕᓂᒡᓗ ᑲᒪᕙᒃᖢᑎᒃ); ᐋᖅᑭᒃᓱᐃᕙᒃᖢᑎᒃ ᑕᐅᑦᑐᒃᓴᖓᓂᒃ ᑲᔪᓯᑎᑦᑎᕙᒃᖢᑎᒡᓗ ᑎᑎᕋᖅᓯᒪᔪᓄᑦ ᐊᑐᖅᑕᐅᕙᒃᑐᓂᒃ; ᑲᔪᓯᑎᑦᑎᕙᒃᖢᑎᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᓴᕐᓂᕐᓂᒃ; ᐊᐅᓚᑦᑎᕙᒃᖢᑎᒡᓗ ᐱᖁᑎᒋᔭᐅᔫᑉ ᐱᐅᓂᖓᓂᒃ ᖃᓄᕐᓗ ᐊᖏᑎᒋᓂᖓᓂᒃ.
• ᐊᑐᐊᒐᓕᕆᓂᕐᒧᑦ ᐱᕙᒌᔭᕐᓂᕐᒧᓪᓗ – ᑕᒪᒃᑯᐊ ᓄᑖᑦ ᐊᐅᓚᑦᑎᓂᕐᒧᑦ ᖃᓄᐃᓕᐅᖅᑕᐅᕙᓪᓕᐊᓂᐊᖅᑐᑦ ᐊᑐᐊᒐᐃᓪᓗ ᐊᖏᖅᑕᐅᔭᕆᐊᖃᕋᓗᐊᖅᑎᓪᓗᒋᑦ ᒥᓂᔅᑕᐅᖃᑎᒌᓂᑦ ᑮᓇᐅᔭᓕᕆᓂᕐᒧᓪᓘᓐᓃᑦ ᐊᐅᓚᑦᑎᔨᒋᔭᐅᕙᒃᑐᓂᒃ ᑲᑎᒪᔨᓂᑦ ᐊᑐᓕᖅᑎᑕᐅᓚᐅᙱᓐᓂᐊᓐᓂ, ᐅᖅᓱᐊᓗᓕᕆᔨᒃᑯᑦ ᑲᒪᒋᔭᒃᓴᖃᖅᐳᑦ ᓇᐅᑦᑎᖅᓱᖅᓯᓂᕐᒥᒃ ᓂᕆᐅᒋᔭᖃᕐᓂᕐᒥᒡᓗ ᐃᓱᒪᒋᔭᒃᓴᓂᒃ ᖃᓄᐃᓕᐅᕐᓂᕆᔭᐅᔪᓂᒡᓗ ᐊᒃᑐᖅᓯᑐᐃᓐᓇᕆᐊᓕᖕᓂᒃ ᑲᔪᓯᓂᕆᑦᑎᐊᖅᐸᒃᑕᖓᓄᑦ ᐊᐅᓚᓂᕆᔭᖓᑕ. ᐅᖅᓱᐅᓗᓕᕆᔨᒃᑯᑦ ᑲᒪᒋᔭᒃᓴᖃᖅᐳᑦ ᐋᖅᑭᒃᓱᐃᕙᓪᓕᐊᓂᕐᒥᒃ ᖃᓄᐃᓕᐅᖅᑕᐅᕙᓪᓕᐊᓂᐊᖅᑐᓂᒃ ᐋᖅᑭᒃᓱᐃᓂᕐᒥᒡᓗ ᐊᑐᐊᒐᕐᓂᒃ, ᓄᓇᕗᑦ ᒐᕙᒪᖓᑕ ᐊᖏᕐᓂᐊᖅᑕᖏᓐᓄᑦ, ᒥᑭᒡᓕᒋᐊᖅᑎᑦᑎᓇᔭᖅᑐᓂᒃ ᐱᐅᙱᑦᑐᓂᒃ ᖃᓄᐃᓕᖓᓕᕋᔭᖅᑐᓂᒃ ᓇᓗᙱᑦᑎᐊᕐᓂᖅᓴᐅᔪᒪᒧᓪᓘᓐᓃᑦ ᐱᐅᓂᖅᓴᐅᓇᔭᕐᓂᖏᓐᓂᒃ ᓄᓇᕗᑦ ᒐᕙᒪᖓᓄ ᐊᑐᖅᑎᒋᕙᒃᑕᖏᓐᓄᓪᓗ.

ᑭᓱᓂᒃ ᐱᖁᑎᓂᒃ ᐅᖅᓱᐊᓗᓕᕆᔨᒃᑯᑦ ᐱᑎᑦᑎᕙᒃᐸᑦ?

ᐅᖅᓱᐅᓗᓕᕆᔨᒃᑯᑦ ᐱᑎᑦᑎᕙᒃᐳᑦ ᑎᓴᒪᓪᓗᐊᑕᕐᓂᒃ ᐅᖅᓱᐊᓗᖕᒦᙶᖅᑐᓂᒃ ᐃᒪᓐᓇ:

ᐃᑭᓴᕋᐃᑦᑐᖅ ᐊᑐᖅᑕᐅᓪᓗᐊᑕᖅᐸᒃᐳᖅ ᐅᖅᓱᐊᓗᒋᔭᐅᓪᓗᓂ ᐃᖏᕐᕋᔾᔪᑎᓄᑦ ᐊᖏᓗᐊᙱᑦᑐᓄᑦ ᖃᒧᑕᐅᔭᓄᑦ ᐊᐅᓚᐅᑎᓄᓪᓗ ᐅᒥᐊᖅᓯᐅᑎᓄᑦ.

Jet A-1 ᓇᓗᓇᐃᒃᑯᑕᖅᑖᖅᑎᑕᐅᓯᒪᕗᖅ ᑎᖕᒥᓲᓄᑦ ᐊᑐᖅᑕᐅᔪᒃᓴᐅᑕᐅᓪᓗᓂ ᑐᓐᓂᖅᑯᑕᐅᓯᒪᕙᒃᖢᓂᓗ ᐸᐅᕋᐅᔭᓕᖕᓄᑦ ᑎᖕᒥᓲᓄᑦ. ᑖᓐᓇ ᐊᑐᖅᑕᐅᖃᑦᑕᑐᐃᓐᓇᕆᐊᖃᖅᐳᖅ ᐃᒐᓯᐅᑕᐅᓗᓂ ᐅᖅᑰᓴᐅᑕᐅᓗᓂᓗ ᐅᖅᓱᐊᓗᒋᔭᐅᔪᓐᓇᖅᖢᓂ, ᑕᐃᒪᐃᓐᓂᖓᓄᓪᓗ ᐊᖏᒡᓕᒋᐊᖅᑎᑦᑎᓯᒪᓗᓂ ᐊᓯᔾᔨᖅᓯᔪᓐᓇᕐᓂᕐᒥᒃ ᐱᖁᑎᒋᔭᐅᔪᓂᒃ ᐊᐅᓚᑦᑎᓂᕐᒧᑦ. ᑎᖕᒥᓲᖅᓯᐅᑎ ᐃᑭᓴᕋᐃᑦᑐᖅ ᐱᑎᑕᐅᖃᑦᑕᖅᐳᖅ ᑎᓴᒪᑐᐊᓄᑦ ᓄᓇᓕᖕᓄᑦ ᓄᓇᕘᓕᒫᒥ. ᑕᒪᕐᒥᑲᓴᑦᑎᐊᖅ ᖃᖓᑕᕙᒃᑐᑦ ᐱᔭᕆᐊᖃᖅᐸᒃᐳᑦ “Jet A-1-ᒥᒃ” ᒥᑭᑦᑐᑯᓗᖕᒥᒡᓗ ᐱᔪᒪᔪᖃᖅᐸᒃᖢᓂ Avgas-ᖑᓂᕋᖅᑕᐅᔪᒥᒃ. ᐊᑦᑎᒃᑐᒦᓐᓂᖓᓄᑦ ᐱᔭᐅᔪᒪᕙᖕᓂᖓ ᑕᒪᑐᒪ, ᐱᕙᒌᔭᖅᓯᒪᔪᖃᙱᓚᖅ ᐊᖏᒡᓕᒋᐊᖅᑎᑦᑎᔪᒪᓇᔭᕐᓂᕐᒥᒃ ᑎᖕᒥᓲᖅᓯᐅᒻᒥᒃ ᐃᑭᓴᕋᐃᑦᑐᒥᒃ.

ᐃᒐᓯᐅᑦ ᐅᖅᓱᐊᓗᒃ ᐅᖅᓱᐅᓘᕗᖅ ᐊᑐᖅᑕᐅᒐᔪᖕᓂᖅᐹᖑᓪᓗᓂ ᓄᓇᕗᒻᒥ ᖃᓄᕈᓘᔭᖅ ᐊᑐᖅᑕᐅᔪᓐᓇᖅᐸᒃᐳᖅ. ᐊᑐᖅᑕᐅᕙᒃᐳᖅ ᐅᖅᑰᓴᐅᑕᐅᓪᓗᓂ, ᓄᒃᑕᕐᓂᕐᒧᑦ (ᐅᕿᙱᑦᑐᓄᑦ ᐃᖏᕐᕋᖅᔪᑎᓄᑦ), ᑎᖕᒥᓲᖅᓯᐅᑕᐅᓪᓗᓂ ᐆᒻᒪᖅᑯᒻᒥᒡᓗ ᓴᖅᑭᑎᑦᑎᔾᔪᑕᐅᕙᒃᖢᓂ.

ᖄᒃᑲᓐᓂᐊᒍᑦ ᑎᓴᒪᐃᑦ ᐊᑐᖅᑕᐅᓪᓗᐊᑕᖅᐸᒃᑐᑦ, ᓱᐴᔫᖅᓯᐅᑦ ᐱᔪᓐᓇᖅᑕᐅᕙᒃᑭᕗᖅ ᐅᖅᓱᐅᓗᓕᕆᔨᒃᑯᓐᓂᑦ. ᑕᒪᓐᓇ ᓱᐴᔫᖅᓯᐅᑦ ᐱᔭᐅᕙᒃᑎᓪᓗᒍ 3.78-ᓂᒃ ᓖᑕᓂᒃ ᐃᒪᓕᖕᓂᑦ ᐴᓂᑦ, ᐱᔭᕆᑐᕙᒃᐳᖅ ᐊᖏᔪᑲᓪᓚᖕᒥᒡᓗ ᐃᑲᔪᖅᑕᐅᓪᓗᓂ ᐊᑭᓕᖅᑕᐅᕙᒃᖢᓂ ᐊᓯᖏᓐᓄᑦ ᐅᖅᓱᐊᓗᖕᓄᑦ ᐊᑭᖓ ᐊᑭᑐᓗᐊᖁᙱᖦᖢᒍ.

ᖃᓄ ᒫᓐᓇᒃᑯᑦ ᓄᓇᕗᑦ ᒐᕙᒪᖓ/ᐅᖅᓱᐊᓗᓕᕆᔨᒃᑯᑦ ᓂᐅᕕᕈᖅᐸᒃᐸᑦ ᐅᖅᓱᐊᓗᖕᒥᒃ?

ᐅᖅᓱᐊᓗᓕᕆᔨᒃᑯᑦ ᑳᓐᑐᓛᖃᖅᑎᑦᑎᕗᑦ ᐅᑯᓂᖓ, Woodward’s Oil ᐱᑎᑦᑎᖃᑦᑕᖁᓪᓗᒋᑦ, ᐃᒪᒃᑯᑦ ᓄᒃᑕᖅᑎᑦᑎᖃᑦᑕᖁᓪᓗᒋᑦ ᑐᓂᐅᖅᑲᐃᖃᑦᑕᖁᓪᓗᒋᓪᓗ ᑕᒪᐃᓐᓂ ᐊᖏᔪᓂᒃ ᐊᑐᕈᓐᓇᖅᓯᑎᑕᐅᓯᒪᔪᓂᒃ ᐅᖅᓱᐊᓗᖕᓂᒃ (ᐃᒐᓯᐅᒻᒥᒃ, ᐃᑭᓴᕋᐃᑦᑐᒥᒃ, Jet A-1-ᒥᒡᓗ) ᑕᒫᓂᓕᒫᖅ ᓄᓇᒋᔭᐅᔪᒥ. ᑕᒪᒃᑯᐊ ᐱᑖᕆᔭᐅᒐᔪᒃᐸᒃᐳᑦ ᐅᖅᓱᐊᓗᖕᓄᑦ ᐊᑐᕈᓐᓇᖅᓯᕝᕕᐅᕙᒃᑐᓂᑦ ᐅᑯᓇᙵᑦ, Saint John, Dartmouth, Montreal ᐊᒻᒪᓗ Come-By-Chance. ᐅᑭᐅᒧᑦ ᐊᑐᕈᓐᓇᖅᑐᒥᒃ ᐃᑭᓴᕋᐃᑦᑐᓂᒥᒃ ᐃᒐᓯᐅᒻᒥᒡᓗ ᓂᐅᕕᖅᑐᖃᕋᔪᒃᐸᒃᐳᖅ ᒫᑦᓯᐅᓕᕌᖓᑦ ᐊᕐᕌᒎᑕᒫᑦ ᑐᖅᑯᖅᑕᐅᓯᒪᕙᒃᖢᓂᓗ ᐅᖅᓱᐅᓗᖕᓄᑦ ᐃᓂᒋᔭᐅᔪᓐᓇᖅᑐᓂ ᐃᓂᖃᖅᑐᓂ Lewisporte-ᒥ, Goose Bay-ᒥ Long Pond-ᒥᓘᓐᓃᑦ ᐊᐅᔭᙳᓚᐅᙱᓐᓂᖓᓂ ᐅᒥᐅᕐᔪᐊᒃᑯᑦ ᐊᐅᓚᑦᑎᑦᑎᔪᓐᓇᖅᓯᓚᐅᙱᓐᓂᖓᓂ. ᑕᒪᓐᓇ ᐊᑐᐊᒐᐅᕙᒃᑐᖅ ᐱᑎᑦᑎᓕᖅᐸᒃᐳᖅ ᐱᐅᓯᒋᐊᖅᓯᒪᔪᒥᒃ ᐅᖅᓱᐊᓗᖕᒧᑦ ᐱᔪᓐᓇᑦᑎᐊᕐᓂᐊᕐᓂᕐᒥᒃ ᓴᖅᑭᑎᑦᑎᓯᒪᓪᓗᓂᓗ ᐊᖏᔪᑲᓪᓚᖕᒥᒃ ᑮᓇᐅᔭᓂᒃ ᐊᑐᙱᓐᓂᖅᓴᐅᕙᖕᓂᖏᓐᓂᑦ ᓄᓇᕗᑦ ᒐᕙᒪᒃᑯᖏᑦ.

ᖃᓄᖅ ᓄᓇᕗᑦ ᒐᕙᒪᒃᑯᖏᑦ ᐋᖅᑭᒃᓯᕙᒃᐸᑦ ᐅᖅᓱᐊᓘᑉ ᐊᑭᒋᓂᐊᖅᑕᖏᓐᓂᒃ?

ᒐᕙᒪᒃᑯᑦ ᑮᓇᐅᔭᓕᕆᓂᕐᒧᑦ ᑲᑎᒪᔨᖏᑦ ᐱᔪᓐᓇᐅᑎᖃᖅᐳᑦ ᐋᖅᑭᒃᓯᔪᓐᓇᖅᖢᑎᒃ ᓂᐅᕕᖅᑕᐅᓗᓂ ᐊᑭᒋᖃᑦᑕᕐᓂᐊᖅᑕᖏᓐᓂᒃ ᓄᓇᓕᖕᓂ ᐱᔨᑦᑎᕋᕐᕕᐅᕙᒃᑐᓂ ᐅᖅᓱᐊᓗᓕᕆᔨᒃᑯᓐᓂᑦ.

ᓂᐅᕕᖅᑕᐅᓂᐊᕐᓗᓂ ᐅᖅᓱᐅᓗᒃ ᐊᑭᖓ ᑐᙵᕕᖃᖅᑎᑕᐅᕙᒃᐳᖅ ᐅᑯᓄᖓ ᐊᑮᑦ ᐃᓱᒪᒋᔭᐅᖃᑕᐅᓪᓗᑎᒃ:

• ᐅᖅᓱᐅᓘᑉ ᐊᑭᓪᓚᑦᑖᕆᔭᖓᓄᑦ;
• ᓄᒃᑕᖅᑎᑕᐅᓂᖓᑕ ᐊᑭᓪᓚᑦᑖᕆᔭᖓᓄᑦ;
• ᐱᔭᐅᓕᖅᐸᒃᑐᓂᑦ ᓄᓇᓕᖕᓂ ᐅᖅᓱᐅᓗᖕᒥᒃ ᓂᐅᕐᕈᑎᖃᕐᓂᕐᒧᑦ, ᑐᓂᐅᖅᑲᐃᕙᖕᓂᕐᒥᒃ ᑐᓂᓯᓂᕐᒧᓪᓗ ᐱᔨᑦᑎᕋᕐᓂᕆᔭᐅᕙᒃᑐᓂᒃ;
• ᐊᐅᓚᑦᑎᓂᕐᒧᑦ ᑲᒪᒋᔭᖃᖅᐸᖕᓂᕐᒧᓪᓗ ᐊᑭᓕᕆᐊᖃᓕᖅᐸᒃᑐᓄᑦ;
• ᐱᖁᑎᒋᔭᐅᔫᑉ ᑎᒡᔭᐅᖅᐸᓪᓕᐊᕙᖕᓂᖓᓄᑦ/ᒥᑭᒡᓕᒋᐊᖅᐸᖕᓂᖓᓄᑦ; ᐊᒻᒪᓗ
• ᑖᒃᓰᔭᕐᓂᕐᒧᑦ (ᑕᐃᒪᐃᑦᑐᕐᓇᕐᕕᒋᔭᖓᓂ).

ᑲᑎᖦᖢᒋᑦ ᑖᒃᑯᐊ ᖃᐅᔨᒪᓕᕈᑕᐅᕙᒃᐳᖅ ᐊᑭᒋᓪᓗᐊᑕᕐᓂᐊᖅᑕᖓᓂᒃ ᐅᖅᓱᐊᓘᑉ ᐊᑐᖅᑕᐅᕙᒃᖢᓂᓗ ᐋᖅᑭᒃᓯᔾᔪᑕᐅᓪᓗᓂ ᓂᐅᕕᖅᑕᐅᓗᓂ ᐊᑭᒋᖃᑦᑕᕐᓂᐊᖅᑕᖓᓂᒃ ᑕᒪᐃᓐᓂ ᐊᑐᓂᑦ ᓄᓇᓕᖕᓂ. ᐃᓚᖏᓐᓂ ᓄᓇᓕᖕᓂ ᓂᐅᕕᖅᑕᐅᓂᖓᑕ ᐊᑭᖓ ᐊᑦᑎᖕᓂᖅᓴᐅᕙᒃᐳᖅ ᐊᑭᓪᓚᑦᑖᕆᔭᖓᓂᑦ ᐱᑎᑦᑎᖃᑦᑕᕐᓂᐊᕐᓗᓂ ᐱᔨᑦᑎᕋᕐᓂᕆᔭᐅᔫᑉ. ᐊᔾᔨᒋᙱᓐᓂᕆᔭᖓ ᖃᓄᖅ ᐊᖏᑎᒋᓂᖓᑕ ᐃᑲᔪᖅᑕᐅᕙᖕᓂᕆᔭᐅᔫᑉ ᓴᖅᑭᓕᖅᐸᒃᑑᑉ ᓄᓇᓕᖕᓂ ᐅᖅᓱᐅᓗᖕᓂᓗ ᐱᒋᔭᐅᔪᓂ. ᑐᕌᕆᔭᐅᔪᖅ ᐋᖅᑭᒃᓯᔪᒪᓂᐅᕗᖅ ᓂᐅᕕᖅᑕᐅᓗᓂ ᐊᑭᒋᖃᑦᑕᕐᓂᐊᖅᑕᖏᓐᓂᒃ ᐊᔾᔨᒌᒃᑎᑦᑎᔾᔪᒥᓪᓗᓂ ᐊᑭᒋᖃᑦᑕᕋᔭᖅᑕᖓ ᐱᖁᑎᒋᔭᐅᔪᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᓪᓗ ᓇᓕᐊᖕᓂᑐᐃᓐᓇᖅ ᓄᓇᓕᖕᓂ.

ᑭᓲᕙᑦ ᐅᖅᓱᐅᓗᖕᓄᑦ ᐊᓯᔾᔨᖅᐸᓪᓕᐊᕙᒃᑐᑦ ᑮᓇᐅᔭᖁᑎᒋᔭᐅᔪᑦ?

ᐅᖅᓱᐅᓗᓕᕆᔨᒃᑯᑦ ᐊᐅᓚᕙᒃᐳᑦ ᐅᑯᑎᒎᓇᖅ, ᐅᖅᓱᐅᓗᖕᓄᑦ ᐊᓯᔾᔨᖅᐸᓪᓕᐊᕙᒃᑐᑦ ᑮᓇᐅᔭᖁᑎᒋᔭᐅᔪᑦ ᐱᖁᔭᖓᑎᒍᑦ. ᑖᓐᓇ ᐱᖁᔭᖅ ᐋᖅᑭᔾᔪᑕᐅᕙᒃᐳᖅ ᑲᔪᓯᐊᔾᔪᑕᐅᓂᐊᖅᑐᓂᒃ ᓂᐅᕕᕐᓂᐊᕐᓗᓂ, ᓄᒃᑕᖅᑎᑦᑎᓂᐊᕐᓗᓂ, ᑐᖅᑯᖅᓯᓯᒪᓂᐊᕐᓗᓂ, ᑐᓂᐅᖅᑲᐃᓂᐊᕐᓗᓂ, ᓂᐅᕐᕈᑎᖃᕐᓂᐊᕐᓗᓂ ᐱᑎᑦᑎᖃᑦᑕᕐᓂᐊᕐᓗᓂᓗ ᐊᑐᕈᓐᓇᖅᓯᑎᑕᐅᓯᒪᔪᓂᑦ ᐅᖅᓱᐊᓗᖕᓂᒃ ᓄᓇᓕᖕᓂ ᓄᓇᕘᒥ ᖁᐊᖅᓵᕐᓇᙱᑦᑐᒃᑯᑦ, ᐊᑭᑐᓗᐊᙱᑦᑐᒃᑯᑦ, ᑲᔪᓯᑦᑎᐊᕈᓐᓇᖅᑐᒃᑯᑦ ᐊᑐᖅᑕᐅᑦᑎᐊᕈᓐᓇᖅᑐᒃᑯᓪᓗ.

ᐊᔾᔨᒋᓇᓂᐅᒃ ᑕᒪᐃᑕᑲᓴᒃ ᒐᕙᒪᒃᑯᑦ ᐊᐅᓚᓂᕆᕙᒃᑕᖏᑕ, ᐊᑭᒋᔭᖏᑦ ᑕᒪᒃᑯᐊ ᐱᓕᕆᓂᕆᔭᐅᕙᒃᑐᑦ ᑐᕌᖓᑎᑕᐅᕗᖅ ᐊᑭᓕᖅᓱᖅᑕᐅᖃᑕᐅᔪᒃᓴᐅᑕᐅᓪᓗᓂ ᓂᐅᕕᖅᑕᐅᕙᓪᓕᐊᔪᓂᑦ ᓂᐅᕐᕈᑎᒋᔭᐅᔪᓂᑦ ᐅᖅᓱᐊᓗᖕᒥᑦ. ᑕᐃᒪᐃᓐᓂᖓᓄᓪᓗ, ᑮᓇᐅᔭᓕᕆᓂᕐᒧᑦ ᐊᑐᖅᑕᐅᖃᑦᑕᕐᓂᐊᖅᑐᒥᒃ ᐱᔪᖃᕆᐊᖃᖅᐳᖅ ᐱᕕᒃᓴᖃᖅᑎᑦᑎᔪᒪᓪᓗᓂ ᐅᖅᓱᐊᓗᓕᕆᔨᒃᑯᑦ ᐊᐅᓚᑦᑎᓂᕐᒧᑦ ᐊᑭᓕᖅᓱᕆᐊᖃᖅᐸᒃᑕᖏᓐᓂᒃ ᑕᒪᓐᓇᓗ ᑮᓇᐅᔭᖃᖅᑎᑕᐅᖃᑦᑕᕐᓂᐊᖅᖢᓂ ᐅᖅᓱᐅᓗᓕᕆᔨᒃᑯᑦ ᐊᓯᔾᔨᖅᐸᓪᓕᐊᕙᒃᑐᖁᑎᖓᒍᑦ ᑮᓇᐅᔭᑎᒍᑦ, ᑖᓐᓇᓗ ᐱᑎᑦᑎᕙᒃᖢᓂ ᑮᓇᐅᔭᓂᒃ ᐊᑐᖅᑕᐅᔪᓐᓇᖅᑐᓂᒃ ᓂᐅᕕᕐᓂᐊᕐᓗᓂ ᑐᓂᐅᖅᑲᐃᓂᐊᕐᓗᓂᓗ ᐅᖅᓱᐊᓗᖕᒥᒃ ᐊᑐᖅᑕᐅᕙᒃᑐᒥᒃ ᐊᕐᕌᒍᓕᒫᒧᑦ ᓄᓇᕘᒥ ᓄᓇᓕᒋᔭᐅᔪᓂ. ᐊᓯᔾᔨᖅᐸᓪᓕᐊᕙᒃᑐᑦ ᑮᓇᐅᔭᖁᑎᒋᔭᐅᔪᑦ ᐊᐅᓚᕙᒃᐳᑦ ᐊᔾᔨᖃᑲᓴᒃᖢᑎᒃ ᑮᓇᐅᔭᓕᐅᕋᓱᖕᓂᕐᒧᑦ ᐊᑮᑦᑐᖅᑖᕈᑕᐅᓕᖅᐸᒃᑐᓂᒃ ᐊᑐᖅᑕᐅᕙᒃᑐᓂᒃ ᐃᓛᒃᑰᖅᑐᓂᑦ ᑮᓇᐅᔭᖃᖅᑎᑦᑐᒪᓪᓗᒋᑦ ᐊᑭᓕᖅᓱᒐᒃᓴᐃᑦ ᐱᔭᐅᕙᓪᓕᐊᕙᒃᑐᑦ ᐱᔭᐅᓯᒪᔪᓪᓗ.

ᑖᒃᑯᐊ ᑮᓇᐅᔭᐃᑦ ᐱᑎᑦᑎᕙᒃᐳᑦ ᐱᓕᕆᔾᔪᑕᐅᓂᐊᖅᑐᓂᒃ ᑐᓂᔭᐅᓵᓕᔪᓂᒃ ᑮᓇᐅᔭᖃᖅᑎᑦᑐᒪᓪᓗᒋᑦ ᐱᖁᑎᒋᔭᐅᔪᑦ, ᑮᓇᐅᔭᐃᑦ ᐱᔭᐅᔪᒃᓴᐃᑦ, ᐊᐅᓚᑦᑎᓂᕐᒧᑦ ᐊᑭᓕᖅᓱᒐᒃᓴᐃᑦ ᑖᒃᓰᔭᐅᑕᐅᔭᕆᐊᖃᖅᐸᒃᑐᓪᓗ. ᐊᖏᖅᑕᐅᓯᒪᔪᑦ ᐃᓱᓕᑦᑕᕐᕕᖏᑦ ᑖᒃᑯᐊ ᑮᓇᐅᔭᖁᑎᒋᔭᐅᔪᑦ, ᑖᓐᓇᓗ ᐅᓄᕐᓂᖅᐹᕆᓪᓗᓂᐅᒃ ᖃᔅᓯᐅᔪᓐᓇᕐᓂᖓ ᑖᒃᑯᐊ ᐱᓯᒪᔭᐅᔪᑦ ᖄᖏᐅᑎᔪᓐᓇᕐᑐᐃᓐᓇᕆᐊᖃᕐᓂᖓᑕ ᐊᑭᓕᖅᓱᒐᒃᓴᓄᑦ $200-ᒥᓕᐊᓐ-ᖑᕗᑦ. ᐅᖅᓱᐊᓗᓕᕆᔨᒃᑯᑦ ᐃᒪᐃᑎᑕᐅᔭᕆᐊᖃᖅᐳᑦ PPRF-ᒧᑦ ᐱᖁᔭᕆᔭᐅᔪᒥᑦ ᐅᑎᖅᑎᑦᑎᖃᑦᑕᖁᔭᐅᓪᓗᑎᒃ ᑐᓂᐅᔭᐅᓵᓕᓂᑯᓂᒃ ᐊᓯᔾᔨᖅᐸᓪᓕᐊᕙᒃᑐᓂᑦ ᑮᓇᐅᔭᖁᑎᒋᔭᐅᔪᓂᑦ ᓂᐅᕐᕈᑎᖃᕐᓂᒃᑯᑦ.

ᐅᖅᓱᐊᓗᖕᓄᑦ ᐊᓯᔾᔨᖅᐸᓪᓕᐊᕙᒃᑐᒧᑦ ᑮᓇᐅᔭᖁᑎᒋᔭᐅᔪᓄᑦ ᐱᖁᔭᖅ PPRF-ᑯᓐᓂᒃ ᐊᐅᓚᑎᑦᑎᔭᕆᐊᖃᖅᐸᒃᐳᖅ ᐃᒪᓐᓇ, “ᐊᑭᓕᒐᒃᓴᓄᑦb-ᓇᓕᒧᓐᓂᖃᑦᑎᐊᕐᓗᓂ”. ᑭᓯᐊᓂᑦᑕᐅᖅ, ᐊᔾᔨᒌᙱᓐᓂᖃᖅᐸᖕᓂᖏᓐᓄᑦ ᖄᖏᐅᑎᔾᔪᑏᑦ ᑮᓇᐅᔭᓕᐊᖑᔪᑦ ᐊᓯᐅᔨᔭᐅᕙᒃᑐᓪᓗ, ᐅᖅᓱᐊᓗᖕᓄᑦ ᐊᑭᑐᓗᐊᖅᑎᑦᑎᑦᑕᐃᓕᒪᓂᕐᒧᑦ ᑮᓇᐅᔭᖁᑎᒋᔭᐅᓂᐊᖅᑐᓂᒃ ᐋᖅᑭᒃᓯᔪᖃᓚᐅᖅᓯᒪᕗᖅ ᐊᑭᖓ ᐅᖅᓱᐅᓘᑉ ᐊᓯᔾᔨᖅᑕᐅᖃᑦᑕᕆᐊᖃᔾᔮᙱᒻᒪᑦ ᐊᕐᕋᒍᑕᒫᑦ ᐊᑐᖅᑎᑦᑎᕕᒋᔪᒪᓗᒍ ᐊᔾᔨᒌᙱᓐᓂᕆᕙᒃᑕᖏᓐᓂᒃ. ᐃᓱᓕᑦᑕᕐᕕᖓ ᐅᖅᓱᐊᓗᖕᓄᑦ ᐊᑭᑐᓗᐊᖅᑎᑦᑎᑦᑕᐃᓕᒪᓂᕐᒧᑦ ᑮᓇᐅᔭᖁᑎᒋᔭᐅᔪᑦ ± $10 ᒥᓕᐊᖑᕗᑦ, ᑖᓐᓇᐅᕌᓪᓚᓚᐅᖅᑎᓪᓗᒍᓗ ᓈᒻᒪᒃᓯᓕᕈᑎᓂᒃ ᐱᔪᖃᕆᐊᖃᕋᔭᖅᖢᓂ. ᑖᓐᓇ ᐊᑭᑐᓗᐊᖅᑎᑦᑎᑦᑕᐃᓕᒪᓂᕐᒧᑦ ᑮᓇᐅᔭᖁᑎᒋᔭᐅᔪᖅ ᑲᑎᑦᑎᕙᓪᓕᐊᕙᒃᐳᖅ ᖄᖏᐅᑎᔾᔪᑕᐅᔪᓂᒃ/ᐊᓯᐅᔨᔭᐅᔪᓂᒃ ᑮᓇᐅᔭᓂᒃ PPRF-ᒥ. ᑖᓐᓇ ᐊᔾᔨᖃᑲᓴᒃᐳᖅ ᐱᓯᒪᓂᕐᒧᑦ ᑮᓇᐅᔭᓕᐅᕐᓂᕐᒧᑦ ᑮᓇᐅᔭᖃᕐᕕᒋᔭᐅᔪᒥ ᑎᑎᕋᖅᓯᒪᑎᑕᐅᔪᒥ ᑮᓇᐅᔭᓄᑦ ᐅᓂᒃᑳᓕᐊᖑᓯᒪᔪᓂ ᐊᑐᖅᑕᐅᕙᒃᑐᓂ ᐃᓛᒃᑰᖅᑐᓂ.

ᖃᓄᐃᓕᐅᖅᑐᖃᖃᑦᑕᕈᓐᓇᖅᐸ ᒥᑭᒡᓕᒋᐊᖅᑎᑦᑎᔪᒪᓂᐊᕐᓗᓂ ᐊᑭᓕᖅᓱᒐᒃᓴᓄᑦ ᐊᒃᓱᕈᓐᓇᖅᓯᖃᑦᑕᖅᑐᓄᑦ?

ᐊᑐᕈᒪᙱᓪᓗᒍ ᓇᓗᓇᕈᔪᒃᐸᒃᑐᖅ ᐊᓯᙳᖅᓴᕋᐃᑉᐸᒃᑐᖅ ᐊᑭᖓ ᑕᐃᒪᐃᑎᑕᐅᓪᓗᓂ ᓄᓇᕐᔪᐊᓕᒫᒥ ᐊᑭᒋᑎᑕᐅᔪᒧᑦ ᐱᑖᕆᔭᐅᕙᓪᓕᐊᔪᑦ ᐊᓯᔾᔨᑲᑕᒃᐸᖕᓂᖏᓐᓄᑦ ᐊᑭᖏᑦ, ᓄᓇᕗᑦ ᒐᕙᒪᒃᑯᖏᑦ ᒥᑭᑦᑐᒃᑰᖅᑎᑦᑎᓇᓱᒍᓐᓇᖅᐳᑦ ᖁᑦᑎᖕᓂᖅᓴᒥᒃ ᐊᑭᖓᓂᒃ ᐊᑐᓕᖅᑎᑦᑎᓗᑎᒃ ᐃᒪᐃᑦᑐᒥᒃ, “ᐊᓯᐅᔨᑦᑕᐃᓕᒪᔾᔪᑎᒥᒃ ᐊᑐᖅᑕᐅᔪᓐᓇᖅᑐᒥᒃ”. ᑖᓐᓇ ᐊᓯᐅᔨᑦᑕᐃᓕᒪᔾᔪᑎ ᐱᕕᒃᓴᖃᖅᑎᑦᑎᕙᒃᐳᖅ ᓂᐅᕕᖅᑐᒥᒃ ᖃᐅᔨᒪᕙᒌᕈᓐᓇᕐᓂᕐᒥᒃ ᓂᐅᕐᕈᑕᐅᕙᖕᓂᖓᓄᑦ ᐊᑭᖓᓂᒃ ᐊᑭᓕᕈᒪᓇᔭᖅᑕᖓᓂᒃ ᐅᖅᓱᐅᓗᖕᒥᓄᑦ ᓂᐅᕕᕐᓂᕐᒥᒍᑦ ᑮᓇᐅᔭᓄᑦ ᐊᑐᖅᑕᐅᔪᓐᓇᖅᑐᓂᒃ ᐅᑯᓇᓂ “futures” ᐅᕝᕙᓘᓐᓃᑦ “options” ᓂᐅᕐᕈᑕᐅᕙᒃᑐᓂᒃ ᐅᕙᓂ, New York Mercantile Exchange (NYMEX)

ᖃᔅᓯᑲᓪᓚᐅᕗᑦ ᐊᑐᖅᑕᐅᖔᕈᓐᓇᖅᑐᑦ ᒪᓂᒪᓪᓗᑎᒃ ᓂᐅᕐᕈᑎᖃᕐᕕᐅᕙᒃᑐᒥ, ᑕᓯᐅᖅᑕᐅᔪᖃᕆᐊᖃᕋᔭᖅᐳᕐᓗ ᐱᓕᕆᖃᑦᑕᖅᓯᒪᓂᑯᓂᑦ ᓂᐅᕐᕈᑎᖃᖅᐸᒃᑐᓂᒃ ᐋᖅᑭᒍᒪᓪᓗᒍ-ᐃᒻᒥᒧᑦ ᓈᒻᒪᒡᓗᓂᓗ ᐊᑐᖅᑕᐅᖔᕈᓐᓇᕐᓗᓂ ᓈᒻᒪᑦᑎᐊᕐᓗᓂ ᐱᑖᖅᐸᒃᑑᑉ ᑮᓇᐅᔭᑦ ᖃᓄᐃᓕᖓᓂᕆᔭᖓᓄᑦ. ᐃᒪᓐᓇᐅᕙᒃᐳᖅ ᖃᓄᐃᓕᖓᓂᐊᕋᓱᒋᓐᓈᔭᕆᐊᖃᖅᐳᒍᑦ ᓯᕗᓂᒃᓴᒥ ᐊᑭᒋᓇᔭᖅᑕᖓᓄᑦ ᐅᖅᓱᐅᓘᑉ ᓂᐅᕐᕈᑕᐅᕙᒡᓗᓂ ᓄᓇᕗᑦ ᒐᕙᒪᒃᑯᖏᑕ ᑐᓂᐅᖅᑲᐃᕝᕕᒋᔭᖓᓂ ᐅᒥᐊᕐᔪᐊᒃᑯᑦ ᔪᓚᐃ - ᐅᑐᐱᕆᒥ ᐊᕐᕌᒍᑕᒫᑦ. ᐊᒻᒪᐃᓛᒃ ᖁᐊᖅᓵᕐᓇᖅᑐᒥᒃ ᐊᑐᓕᖅᐸᒃᐳᒍᑦ ᓂᐅᕕᖅᓵᓕᓪᓗᑕ futures/options-ᓂᒃ ᓂᕈᐊᕆᔭᐅᔪᓯᒪᔪᑎᒍᑦ ᐊᑭᖓᑎᒍᑦ, ᐊᒻᒪᐃᓛᒃ ᑎᑭᑎᑕᐅᓯᒪᓕᖅᐸᑕ ᓂᐅᕐᕈᑎᒋᓗᒋᑦ ᑮᓇᐅᔭᓕᐅᕈᑎᒋᓗᒋᑦ, ᐊᓯᐅᔨᕝᕕᒋᓗᒋᑦ ᐊᓯᐅᔨᙱᓪᓗᓂᓘᓐᓃᑦ ᑮᓇᐅᔭᓕᐅᙱᓪᓗᓂᓘᓐᓃᑦ.

ᖃᐅᔨᒋᐊᕐᕕᒃᓴᐃᑦ ᐅᖅᓱᐅᓗᓕᕆᔨᒃᑯᓐᓂ
ᑎᑎᖅᑲᒃᑯᕕᐊ 590
ᑲᖏᖅᖠᓂᖅ, ᓄᓇᕗᑦ
X0C 0G0
ᓱᒃᑲᔪᒃᑯᑦ: 867-645-3554
ᐅᖄᓚᐅᑎᒃᑯᑦ: 867-645-8400
ᖃᕆᑕᐅᔭᒃᑯᑦ: scott.cooper@gov.nu.ca